الجمعة، 20 أبريل، 2012

خد قلبك بالحضن !

خد قلبك بالحضن
طبطب عليه
أعمله كوباية شاي بلبن
أشتريله شوكولاته من أم خمسة جنيه
أكلم معاه بشويش
فهمه إن الحب مش عيب
وإن التهور ما يجبش غير وجع القلب
إن اللي يعيش ياما يشوف
قوله إن الدنيا مش طيبة
وإنها بتسيب جوانا خرابيش
لو عيط منك أوعا تشد عليه
خده براحة وزود ضمة حضنك
ملس علي راسه بحب
وقوله ميزعلش
وإنك عايزه يعيش مبسوط
إنك مش قصدك تقسي
قوله يدوق م الدنيا عسلها
ميحاولش يرجع الحاجة اللي تموت
لما تخلص
اوعا تسيبه يروح
زود مدة حضنك نص دقيقة كمان
وأنزل هات شوكولاتة وكلها معاه
وأما تخلص بوس علي راسه
وأفرد فوقه لحاف م الجنة
وقوله: "أحلام سعيدة"

لـ كريم هشام

ليست هناك تعليقات:

إرسال تعليق